Merħba f’ADHD Malta

Nsaħħu l-potenzjal. Nippromwovu l-fehim. Noħolqu bidla.

Kull persuna jistħoqqilha tirnexxi

F’ADHD Malta, nemmnu li kull persuna jistħoqqilha tirnexxi.

Aħna organizzazzjoni volontarja, reġistrata legalment (VO 0041), iddedikata biex nappoġġjaw individwi u familji li jgħixu bl-ADHD madwar Malta u Għawdex. 

Il-membri tal-kumitat / bord tagħna huma jew adulti bl-ADHD, jew ġenituri ta’ tfal bl-ADHD, jew it-tnejn – u dan jagħmel lil ADHD Malta wkoll DPO (Organizzazzjoni ta’ Persuni b’Diżabilità).

Min aħna

ADHD Malta tiġbor flimkien ġenituri, individwi bl-ADHD, edukaturi u professjonisti oħra biex tippromwovi fehim aħjar, dijanjosi bikrija u opportunitajiet ugwali.

IL-MISSJONI TAGĦNA: Li nappoġġjaw, nagħtu s-setgħa, nedukaw u nħeġġu lil kull min qed jaffaċċja l-ADHD u kundizzjonijiet relatati, kif ukoll ninkoraġġixxu l-awto-advocacy.

Aħna nfittxu li naħdmu ma’ professjonisti kollha bħal edukaturi fl-iskejjel, fornituri tas-saħħa, ħaddiema soċjali, youth workers, fornituri tas-servizzi tas-saħħa mentali, entitajiet governattivi, NGOs oħra u s-soċjetà inġenerali biex inxerrdu informazzjoni bbażata fuq ir-riċerka dwar l-ADHD u kundizzjonijiet li jikkoeżistu miegħu (bħal dislessija, dispraċċja, awtiżmu, ansjetà, PDA, ODD u dipressjoni). Aħna nfittxu wkoll li nagħtu s-setgħa lill-persuni bl-ADHD u lill-familji tagħhom permezz ta’ psikoedukazzjoni u għodod biex ikunu jistgħu jiddefendu lilhom infushom.

IL-BIDU TAGĦNA: Fl-1996, grupp ta’ ġenituri ta’ adolexxenti bl-ADHD, li kienu qed ifittxu gwida biex jgħinu lil uliedhom, ingħaqdu flimkien biex jiksbu aktar informazzjoni dwar l-ADHD, prinċipalment mill-Istati Uniti u r-Renju Unit. Fl-1998, iddeċidew li jwaqqfu b’mod formali l-ADHD Family Support Group bħala NGO u ġew irreġistrati bħala VO 41. B’dan il-mod setgħu jaqsmu l-għarfien tagħhom ma’ ġenituri oħra, u jedukaw u jqajmu aktar għarfien fost il-professjonisti dwar l-ADHD tul il-ħajja kollha.

Matul is-snin, hekk kif ir-riċerka żdiedet u l-għarfien dwar l-ADHD kompla jiżviluppa, l-NGO bdiet tgħin u tappoġġja dejjem aktar adulti bl-ADHD. Is-servizzi għal adulti f’Malta għadhom qed jiżviluppaw, u għalhekk nippruvaw noffru gwida, psikoedukazzjoni u spazju sigur. Hekk kif l-għarfien qed jinxtered aktar, dejjem aktar nies qed ifittxu dijanjosi u qed jitolbu gwida dwar id-dijanjosi, l-għażliet ta’ trattament, l-użu tal-mediċina u strateġiji li jgħinu. Aħna ma nagħtux pariri mediċi, iżda noffru għarfien ibbażat fuq snin ta’ esperjenza diretta, edukazzjoni u riċerka soda.

Illum magħrufa bħala ADHD Malta, aħna nibqgħu nimmiraw li nkunu punt ta’ referenza affidabbli għal kull min jeħtieġ aktar informazzjoni u appoġġ relatat mal-ADHD.

Il-ħidma Tagħna

Appoġġ u Direzzjoni
  • Nipprovdu informazzjoni, gwida u appoġġ bejn il-pari lil familji bi tfal u adulti bl-ADHD. 
  • Noffru lill-membri ta’ ADHD Malta sessjonijiet ta’ konsulenza b’xejn ma’ counsellors trainees
  • Noffru lill-membri ta’ ADHD Malta sessjonijiet speċjali ta’ coaching ma’ coaches imħarrġa tagħna b’rati speċjali.
Għarfien u Edukazzjoni
  • Norganizzaw sessjonijiet ta’ taħriġ għal professjonisti fuq talba, bħal edukaturi, ħaddiema soċjali, professjonisti tal-HR, care workers u studenti universitarji.
  • Norganizzaw laqgħat ta’ kull xahar, interessanti u informattivi, għall-familji u adulti dwar l-ADHD u suġġetti relatati (fiżikament u/jew online) f’Malta u Għawdex.
  • Nappoġġjaw lill-istudenti fl-edukazzjoni għolja fil-proġetti ta’ riċerka tagħhom dwar l-ADHD, billi ngħinu fir-reklutaġġ ta’ parteċipanti għar-riċerka.
  • Nidhru fil-midja biex naqsmu informazzjoni u xhieda personali dwar esperjenzi bl-ADHD, sabiex inxerrdu aktar għarfien.
Promozzjoni tad-Drittijiet u Kollaborazzjoni

Naħdmu flimkien ma’ NGOs oħra, akkademiċi, policymakers u istituzzjonijiet biex niżguraw li l-ADHD ikun mifhum u li l-bżonnijiet tal-persuni bl-ADHD ikunu appoġġjati sew u inklużi fil-leġiżlazzjoni li tipproteġi komunitajiet newrodiverġenti fis-soċjetà.

Riżorsi u Għodod

Noffru gwida dwar id-dijanjosi u l-immaniġġjar tal-ADHD, materjal edukattiv, għodod, strateġiji u psikoedukazzjoni lill-persuni bl-ADHD u lill-professjonisti li jaħdmu f’dan il-qasam.

Hawn biex nappoġġjaw, nedukaw u nħaddnu d-diversità

Flimkien għal għada aħjar

L-għan ta’ ADHD Malta huwa li toħloq komunità fejn id-differenzi jiġu mifhuma, l-isfidi jiġu appoġġjati u l-potenzjal jiġi ċċelebrat.

Kemm jekk int ġenitur, għalliem, impjegatur, student jew professjonist, l-involviment tiegħek jgħinna nersqu pass eqreb lejn soċjetà li tħaddan in-newrodiversità.

ADHD Malta hija membru ta’:

X’noffru